Jóladagatalið: „Vonandi hefur Gummi Ben eitthvað lært af þessu“

Aðeins einn dagur er til jóla og jóladagatalið heldur áfram göngu sinni. Nú lítum við tæp þrettán ár aftur í tímann á viðtal við Árna Vilhjálmsson.

Árni Vilhjálmsson kom inn á sem varamaður í hálfleik gegn ÍBV í Fótbolta.net mótinu sem var og hét. Hann tryggði Breiðabliki 3-1 sigur með tveimur mörkum í síðari hálfleik.

„Maður er búinn að læra ágætlega mikið af Gumma Ben. Þó að hann sé ekki á hverri einustu æfingu þá kennir hann manni ýmislegt þegar hann er á æfingum. Hann tekur framherjana í 5-10 mínútur á æfingu og kennir þeim að skora.“

Síðara mark Árna var sérstaklega glæsilegt en hann klippti boltann þá í netið. Árni segir að Gummi hafi ekki kennt sér það.

„Hann er reyndar ekki búinn að ná því en vonandi hefur hann lært eitthvað af þessu," sagði Árni léttur.