Vestri tapaði illa gegn Fylki 5-0 í Lengjudeildinni í Árbænum í dag.
Gunnar Heiðar Þorvaldsson þjálfari Vestra var til viðtals hjá Fótbolta.net eftir leikinn í dag.
,,Þetta er högg í andlitið, við erum búnir að eiga góða æfingaviku, við vissum nákvæmlega hvað Fylkir myndi gera. Fyrir mér var þetta ekki 5-0 leikur. Þeir áttu held ég 5-6 skot og fimm þeirra fóru inn. Það er helvíti brutal í fótbolta að þú fáir á þig 5-6 skot og fimm mörk," sagði Gunnar.
„Það er auvðitað hægt að tala um að við séum tveimur mánuðum á eftir í undirbúningi. Auðvitað er auðvelt að tala um að við séum ekki með umgjörðina og bla bla bla, margir að koma seint inn og svona. Við verðum samt að sýna að við séum stærri en þetta, við megum ekki láta spilaborgina hrynja þó við fáum tvö mörk í bakið,"
Staðan var þó aðeins 1-0 í hálfleik en Vestri fékk mark á sig gegn gangi leiksins og Gunnar segir að liðið hefði átt að koma í veg fyrir það.
„Fyrri hálfleikurinn var hrikalega góður, við vissum að hornspyrnan færi á þetta svæði, við vorum búnir að fara yfir það mörgum sinnum. Í fótbolta er það þannig að mörk breyta leikjum."