Hemmi Hreiðars var ánægður með sigurinn
Hermann Hreiðarsson, þjálfari Þróttar Vogum, var afar ánægður með sigur liðsins í B-deild Fótbolta.net mótsins en liðið vann Selfoss 6-2.
Þróttur V. lenti í þriðja sæti mótsins á síðasta ári og gerði sér lítið fyrir og vann mótið í ár.
Mikill karakter einkenndi sigur liðsins. Þróttarar þurftu að vinna með sjö mörkum í síðasta leik riðilsins til að komast í úrslitaleikinn og það tókst gegn Vestra.
Liðið fylgdi því svo á eftir í úrslitaleiknum og gekk frá Selfyssingum sem spiluðu tveimur mönnum færri síðustu tólf mínúturnar.
„Þetta er góð byrjun. Bikar er bikar og við tökum það allt. Þetta er skemmtilegt mót og eykur sjálfstraustið og stemninguna í hópnum, engin spurning," sagði Hermann við Fótbolta.net.
Liðið spilar í 2. deild og er markmiðið skýrt. Liðið ætlar að vera í toppbaráttu.
„Það eru skýr markmið hjá okkur að við ætlum að vera í toppbaráttunni."
„Þetta er sami kjarni og var í sumar. Við erum með örfá ný andlit og frábært tímabil á síðasta ári og við byggjum á því."
„Við erum alltaf með augun opin en við erum kátir með hópinn eins og er en ef eitthvað býst þá skoðum við það," sagði hann í lokin.
Athugasemdir
