Ousmane Dembele verður ekki með gegn Íslandi
Franski landsliðsmaðurinn Ousmane Dembele verður ekki með Frökkum gegn Íslandi í undankeppni HM á þriðjudag, en þetta segir blaðamaðurinn Fabrice Hawkins í dag.
Dembele, sem er spáð sigri í kjörinu á besta fótboltamanni heims, meiddist aftan í læri í 2-0 sigrinum á Úkraínu í gær.
Hann er einn allra mikilvægasti leikmaður landsliðsins og því mikil blóðtaka að missa hann í meiðsli.
Hawkins, sem er einn áreiðanlegasti blaðamaður Frakklands, fullyrðir að Dembele verði frá í sex vikur og mun hann því missa af leiknum gegn Íslandi á Parc des Princes á þriðjudag og mörgum mikilvægum leikjum með Paris Saint-Germain.
Sóknarmaðurinn mun þá líklegast missa af seinni leiknum gegn Íslandi sem er spilaður á Laugardalsvelli um miðjan október.
Dembele var stórkostlegur með PSG á síðasta tímabili er liðið vann þrennuna. Á þessu tímabili hefur hann þegar komið að sjö mörkum í átta leikjum í öllum keppnum.
Athugasemdir
