Jón Dagur Þorsteinsson.
„Það tók smá tíma að brjóta þessa lágu blokk sem þeir voru í. Fyrsta markið kemur á góðum tímapunkti komandi inn í hálfleikinn. Frammistaðan í seinni hálfleik var bara virkilega góð og skemmtilegur bolti sem við vorum að spila. Við náðum að skora fjögur mörk í seinni hálfleiknum þannig við erum bara mjög sáttir“ sagði Jón Dagur Þorsteinsson, landsliðsmaður Íslands, eftir 5-0 sigur á Aserbaídsjan í kvöld.
Lestu um leikinn: Ísland 5 - 0 Aserbaídsjan
„Við náðum 5 mörkum í dag sem er bara virkilega flott. Það tekur líka oft tíma að brjóta lið sem liggja svona neðarlega. Það var virkilega sterkt að ná því, sérstaklega úr horni. Við vorum ekki búnir að skapa okkur mikið fyrri hálfleik en við vissum að við ættum Gullann inni.“
Seinni hálfleikurinn var frábær hjá Íslenska liðinu en Jón Dagur var eins og allir Íslendingar ánægðir með hann.
„Við vorum að spila skemmtilegan bolta og náðum að ýta liðinu upp á völlinn og skora fjögur mörk. Eitt var alveg virkilega flott hjá Ísaki. Þetta var bara virkilega flott frammistaða í dag.“
Ísak Bergmann skoraði tvö mörk í dag og steig upp í seinni hálfleiknum eins og allt liðið.
„Ísak er virkilega góður leikmaður og það var gaman að sjá hvernig hann spilaði í dag.“
Næsti leikur verður gjörólíkur þessum leik, hvernig leggst leikurinn á þriðjudaginn við Frakkland í hópinn?
„Mér líst vel á leikinn við Frakkland. Þetta verður virkilega gaman og við ætlum bara að gefa þeim góðan leik. Þetta verður öðruvísi leikur þar sem við verðum meira að verjast og nýta okkur skyndisóknir. Við erum vel stemmdir í það og klárir í það á þriðjudaginn.“ sagði Jón Dagur Þorsteinsson að lokum.
Viðtalið við Jón má sjá í heild sinni í spilaranum hér að ofan.
Athugasemdir
