Þær Bryndís Lára Hrafnkelsdóttir og Lára Kristín Pedersen hafa yfirgefið herbúðir Þórs/KA.
„Bryndís Lára Hrafnkelsdóttir tilkynnti stjórn Þórs/KA það í gær að hún myndi nýta sér uppsagnarákvæði í samningi sínum við liðið. Bryndís Lára varð Íslandsmeistari með Þór/KA 2017, tók sér síðan hlé frá fótbolta en spilaði engu að síður nokkra leiki með Þór/KA í upphafi tímabils 2018 vegna forfalla. Hún kom síðan aftur á fullt með Þór/KA fyrir tímabilið 2019, en náði ekki að klára tímabilið vegna meiðsla," segir í tilkynningu Þórs/KA.
Lára Kristín hafði sagt við Fótbolta.net að hún væri á förum frá Þór/KA.
„Ég vissi að þegar ég skrifaði undir í fyrra að ég þyrfti alltaf að horfa einungis til eins árs í einu. Eftir að hafa tekið mið af persónulegum högum mínum þá tel ég það rétta ákvörðun að koma aftur í bæinn," sagði Lára.
„Það er sannarlega eftirsjá í báðum þessum leikmönnum því þær eru ekki aðeins frábærar sem leikmenn heldur einnig sterkir karakterar sem hafa gefið liðinu mikið. Þór/KA þakkar Bryndísi Láru og Láru Kristínu fyrir þeirra framlag til liðsins og óskar þeim góðs gengis á nýjum vettvangi."
Fyrr í dag var það tilkynnt að Andri Hjörvar Albertsson væri nýr þjálfari Þórs/KA.
Athugasemdir