Alfreð Finnbogason var allan tímann á varamannabekknum þegar Augsburg tapaði stórt gegn Borussia Mönchengladbach í þýsku úrvalsdeildinni.

Alfreð hafði byrjað síðustu þrjá leiki, en var settur á bekkinn í dag.

Augsburg átti aldrei möguleika, Gladbach var komið í 3-0 eftir aðeins 13 mínútu. Staðan var 4-0 í hálfleik.

Florian Niederlechner minnkaði muninn fyrir Augsburg á 80. mínútu, en stuttu síðar gerði Breel Embolo fimmta mark Gladbach. Lokatölur 5-1 fyrir Gladbach.

Gladbach fer á toppinn í Þýskalandi með þessum sigri. Liðið er með 16 stig eftir sjö leiki. Augsburg er í 14. sæti með fimm stig.

Alfreð snýr aftur í íslenska landsliðshópinn fyrir leikina gegn Frakklandi og Andorra í undankeppni EM. Leikurinn gegn Frökkum er á föstudag og leikurinn gegn Andorra á mánudeginum þar á eftir - báðir leikir á Laugardalsvelli. Alfreð missti af síðasta verkefni vegna meiðsla.