28. umferð deildartímabilsins fer fram um helgina og er ennþá gríðarlega mikil spenna um alla deild, þar sem hart er barist á toppinum, í Evrópubaráttunni og í fallbaráttunni.

Como og Venezia eigast við í nýliðaslag á morgun og þurfa Mikael Egill Ellertsson og félagar í liði Feneyinga á sigri að halda. Þeir eru fimm stigum frá öruggu sæti þegar ellefu umferðir eru eftir.

Þórir Jóhann Helgason og félagar í liði Lecce eiga þá erfiðan heimaleik gegn AC Milan, sem er óvænt búið að tapa þremur deildarleikjum í röð auk þess að hafa verið slegið úr leik í Meistaradeildinni af Feyenoord.

Ítalíumeistarar Inter taka á móti botnliði Monza í lokaleik laugardagsins. Inter trónir á toppi deildarinnar, með eins stigs forystu á Napoli og þremur stigum fyrir ofan Atalanta.

Napoli á erfiðan heimaleik gegn Alberti Guðmundssyni og félögum í liði Fiorentina. Liðin eigast við á sunnudaginn, áður en Empoli tekur á móti Roma og Juventus mætir Atalanta í stórleik helgarinnar.

Atalanta situr í þriðja sæti deildarinnar, þremur stigum fyrir ofan Juve í fjórða sætinu. Lærisveinar Thiago Motta eru búnir að sigra fimm deildarleiki í röð en voru slegnir úr leik í Meistaradeildinni og ítalska bikarnum inn á milli, eftir óvænta tapleiki gegn PSV Eindhoven og Empoli. PSV vann eftir framlengingu og Empoli hafði betur eftir vítaspyrnukeppni.

Lazio og Udinese eigast að lokum við á mánudagskvöldið. Lazio er í harðri baráttu um sæti í Meistaradeildinni á meðan Udinese siglir lygnan sjó um miðja deild eftir fjóra sigra í síðustu fimm umferðum.

Föstudagur
19:45 Cagliari - Genoa

Laugardagur
14:00 Como - Venezia
14:00 Parma - Torino
17:00 Lecce - Milan
19:45 Inter - Monza

Sunnudagur
11:30 Verona - Bologna
14:00 Napoli - Fiorentina
17:00 Empoli - Roma
19:45 Juventus - Atalanta

Mánudagur
19:45 Lazio - Udinese