James Maddison, leikmaður Tottenham Hotspur, verður ekki meira með á tímabilinu vegna meiðsla á hné en þetta er annað höggið sem Tottenham fær í þessari viku.
Englendingurinn meiddist á hné í 3-1 sigri Tottenham á Bodö/Glimt í fyrri leik liðanna í undanúrslitum Evrópudeildarinnar.
Hann var ekki með Tottenham í 1-1 jafnteflinu gegn West Ham um helgina og hefur nú fengist staðfest að tímabili hans sé lokið vegna meiðslana.
Þetta er svakaleg blóðtaka fyrir Tottenham-menn sem setja stefnuna á að komast í úrslit Evrópudeildarinnar í Bilbao, þar sem liðið mun að öllum líkindum mæta Manchester United.
Maddison er annar leikmaðurinn á nokkrum dögum sem Tottenham missir í meiðsli en sænski miðjumaðurinn Lucas Bergvall meiddist á ökkla á æfingu og mun einnig missa af síðustu leikjunum.
Góðu fréttirnar eru hins vegar þær að Dominic Solanke verður klár fyrir seinni leikinn gegn Bodö á morgun.
Athugasemdir
