Aganefndin fundar í dag - „Pjúra rautt en bara einn leikur að mínu mati“

„Þetta er pjúra rautt. Maður sér ekki olnbogann í myndbandinu en hann keyrir inn í hann, hann er ekki að hugsa um boltann og keyrir upp í manninn. En vonandi er þetta bara einn leikur," segir Valur Gunnarsson í Innkastinu en hann hafði skoðað myndband sem náðist á Spiideo vél á vellinum. Þar sést að fjórði dómarinn er rétt hjá atvikinu og snýr að því.

„Það er væntanlega Svenni (Sveinn Arnarsson) fjórði dómari sem sér þetta. Að mínu mati á þetta bara að vera einn leikur í bann en hann sér þetta betur."

Það er nýbúið að gera Aron að fyrirliða KR og í þættinum er hann lastaður fyrir að missa hausinn og skilja liðsfélaga sína eftir tíu. Aron verður í banni gegn Val í næstu umferð.

„Það er búið að gefa honum lyklana að því að leiða þetta lið. Það er engum blöðum um það að fletta að hann er besti leikmaðurinn í þessu liði," segir Tómas Þór Þórðarson en Aron átti ekki góðan leik á Akureyri.

„Gaurinn með bandið fékk rautt eftir ömurlegan leik. Þetta var ekki það versta sem hann gerði í leiknum," segir Valur en Aron vildi ekki tjá sig um rauða spjaldið þegar Fótbolti.net leitaði eftir því í gær.