Þýskaland: Nkunku skoraði tvö er Leipzig kom sér í góða stöðu fyrir lokaumferðina

Portúgalski framherjinn Andre Silva skoraði mikilvægt mark fyrir Leipzig undir lok fyrri hálfleiks áður en franski sóknartengiliðurinn Christopher Nkunku bætti við tveimur mörkum á ellefu mínútum í síðari hálfleik áður en Emil Forsberg gerði fjórða markið úr víti.

Íslenski landsliðsmaðurinn Alfreð FInnbogason sat allan tímann á varamannabekk Augsburg.

Nkunku er nú með 20 mörk og 15 stoðsendingar í þýsku deildinni á þessu tímabili. Leipzig er nú í 4. sæti deildarinnar með 57 stig, tveimur stigum meira en Freiburg fyrir lokaumferðina.

Þýskalandsmeistarar Bayern München fóru illa að ráði sínu gegn Stuttgart en þeim leik lauk með 2-2 jafntefli. Bayern lenti undir en kom til baka og náði svo forystunni áður en hálfleikurinn var úti.

Sasa Kalajdzic jafnaði metin í byrjun síðari hálfleiks en Stuttgart náði ekki inn sigurmarki áður en flautað var til leiksloka. Kingsley Coman var vikið af velli undir lok leiks en þessi úrslit hafa þó lítil áhrif á Bayern sem er þegar búið að vinna deildina. Stuttgart hins vegar þarf á einhverskonar kraftaverki að halda til þess að tryggja öruggt sæti.

Stuttgart þarf að vonast eftir því að Borussia Dortmund slátri Herthu Berlín í lokaumferðinni og þá þarf liðið að vinna stórt gegn Köln, annars þarf liðið að mæta liðinu sem lendir í 3. sæti B-deildarinnar í umspili um sæti í efstu deild.

Úrslit og markaskorarar:

Bayern 2 - 2 Stuttgart
0-1 Tiago Tomas ('8 )
1-1 Serge Gnabry ('35 )
2-1 Thomas Muller ('44 )
2-2 Sasa Kalajdzic ('52 )
Rautt spjald: Kingsley Coman, Bayern ('90)

RB Leipzig 4 - 0 Augsburg
1-0 Andre Silva ('40 )
2-0 Christopher Nkunku ('48 )
3-0 Christopher Nkunku ('57 )
4-0 Emil Forsberg ('64 , víti)

Eintracht Frankfurt 1 - 1 Borussia M.
0-1 Alassane Plea ('4 )
1-1 Goncalo Paciencia ('65 )