Frá æfingu Íslands í Thun.
Stelpurnar í íslenska landsliðinu fengu frí frá æfingu í gær og hittu fjölskyldur og vini í miðbæ Thun í Sviss.
Liðið leikur lokaleik sinn á Evrópumótinu í Sviss á morgun, en stelpurnar okkar eru úr leik á mótinu fyrir leik sinn gegn Noregi.
Liðið leikur lokaleik sinn á Evrópumótinu í Sviss á morgun, en stelpurnar okkar eru úr leik á mótinu fyrir leik sinn gegn Noregi.
Landsliðsmarkvörðurinn Cecilía Rán Rúnarsdóttir segir að það hafi verið erfitt fyrir liðið andlega að jafna sig á þeim vonbrigðum að komast ekki upp úr riðlinum á EM.
„Þetta var náttúrulega ótrúlega erfitt andlega og dagurinn eftir var erfiður," sagði Cecilía á fréttamannafundi í dag.
„Svo fengum við góðan dag í gær með fjölskyldunni og náðum að hreinsa hugann. Við áttum góða æfingu í dag og erum tilbúnar í leikinn á morgun."
Hún segir að það hafi verið gott fyrir liðið að fá smá frí og hitta fjölskyldumeðlimi og vini.
„Ég held að það hafi verið ótrúlega mikilvægt. Við vorum búnar að æfa í 15 daga í röð og það var löngu ákveðið að gefa okkur frí þarna. Svo hitti það þannig á að við þurftum allar frí andlega líka. Það var ótrúlega gott að ná að hreinsa hugann og vera með fjölskyldu og vinum. Við áttum mjög góða æfingu í dag og erum ótrúlega tilbúnar fyrir leikinn á morgun," sagði Cecilía.
Athugasemdir
