Pierre-Emerick Aubameyang tjáði sig um Mikel Arteta, knattspyrnustjóra Arsenal, á neikvæðan hátt í myndbandi sem er vinsælt á veraldarvefnum.
Aubameyang situr í því sem virðist vera hótelherbergi og virðist ekki vera meðvitaður um að verið sé að taka hann upp.
„Hann getur ekki höndlað stóra persónuleika. Hann þarf að hafa unga leikmenn í hópnum, þeir segja ekki neitt, þeir hlusta bara," segir Aubameyang í myndbandinu.
Arteta tók fyrirliðabandið af Aubameyang þegar þeir voru saman hjá Arsenal og leyfði félagið honum svo að fara til Barcelona á frjálsri sölu. Arteta var ekki ánægður með hegðun Aubameyang sem hann taldi ekki vera til fyrirmyndar.
Aubameyang gerði góða hluti hjá Barcelona í vor og var svo keyptur til Chelsea í sumar þar sem hann fékk tveggja ára samning.
Arsenal hefur gengið vel eftir brottför Aubameyang og er í toppbaráttu á upphafi enska deildartímabilsins. Liðið mætir Liverpool í stórleik í dag.
