Mandava skoraði í svekkjandi tapi
Leikjum dagsins er lokið í undankeppni Afríkuþjóða fyrir HM á næsta ári, þar sem Alsír tryggði sér þátttöku með góðum sigri á útivelli.
Riyad Mahrez skoraði og lagði upp í þriggja marka sigri í Sómalíu, sem þýðir að Alsír er á toppi riðilsins með fjögurra stiga forystu fyrir lokaumferðina. Mohamed Amoura, leikmaður Wolfsburg, var atkvæðamestur í sigrinum með tvennu.
Þetta er í fyrsta sinn sem Alsír fer á HM síðan 2014.
Úganda er í öðru sæti og á enn möguleika á að komast á HM sem eitt af liðunum með besta árangurinn í öðru sæti.
Reinildo Mandava, bakvörður Sunderland, skoraði þá í tapleik hjá Mósambík gegn Gíneu. Átján ára gamall Abdoul Karim Traore gerði gæfumuninn í viðureigninni þar sem hann skoraði tvennu fyrir Gíneu.
Þetta er afar sárt tap fyrir Mósambík sem er í sama riðli og Alsír. Með sigri í dag hefðu Mandava og félagar jafnað Úganda á stigum í öðru sæti og átt góða möguleika á að fara á lokamótið í fyrsta sinn í sögunni.
Kenía og Líbería unnu einnig sína leiki í dag en eiga ekki möguleika á að komast á HM þrátt fyrir sigrana.
Egyptaland, Marokkó og Túnis eru búin að tryggja sér þátttöku á HM í Norður-Ameríku á næsta ári ásamt Alsír. Þjóðir á borð við Gana, Fílabeinsströndina, Grænhöfðaeyjar, Suður-Afríku og Senegal gætu fylgt þeim á lokamótið.
Sómalía 0 - 3 Alsír
0-1 Mohamed Amoura ('7)
0-2 Riyad Mahrez ('19)
0-3 Mohamed Amoura ('57)
Mósambík 1 - 2 Gínea
Botsvana 0 - 1 Úganda
Líbería 3 - 1 Namibía
Búrúndí 0 - 1 Kenía
Athugasemdir
