Miðjumaðurinn Eva Rut Ásþórsdóttir er gengin aftur í raðir Fylkis frá Þór/KA. Þetta kemur fram í tilkynningu Fylkis í kvöld.
Eva Rut er uppalin Mosfellingur en hún hóf meistaraflokksferil sinn með Aftureldingu áður en liðið var sameinað með Fram. Hún lék einnig með HK/Víkingi áður en hún gekk í raðir Fylkis árið 2020.
Þar spilaði hún í fimm tímabil, þar af þrjú í efstu deild, og gegndi hlutverki fyrirliða áður en hún gekk í raðir Þórs/KA í byrjun þessa árs.
Eva sleit krossband í fyrsta deildarleik sínum með Þór/KA og var frá út allt tímabilið, en hún er nú komin aftur 'heim' í Fylki.
Samningurinn gildir til tveggja ára en hún ætlar að vera hluti af því að rífa liðið upp úr þeirri krísu sem nú ríkir hjá félaginu.
Fylkir féll niður í 2. deild í sumar en þetta er annað árið í röð sem Fylki fer niður um deild.
Athugasemdir
