Það tókst engum að setja boltann í netið þegar Köln tók á móti Mainz í fallbaráttu þýska boltans í dag.

Gestirnir frá Mainz voru talsvert sterkari aðilinn í leiknum en tókst ekki að skora framhjá besta leikmanni vallarins, Marvin Schwäbe.

Mainz fékk nokkur dauðafæri sem fóru forgörðum og komust heimamenn í Köln einnig nálægt því að skora, en tókst ekki að stela stigunum þremur.

Svekkjandi jafntefli fyrir Mainz sem var betra liðið, en liðið situr eftir í næstneðsta sæti þýsku deildarinnar með 9 stig eftir 14 umferðir. Köln er með 10 stig.