Sambandsdeildin: Breiðablik steinlá í Istanbúl

Breiðablik er úr leik í Evrópu eftir að hafa tapað gegn stórliðinu Istanbul Basaksehir bæði á Íslandi og í Tyrklandi.

Blikar voru óheppnir í fyrri leiknum sem var nokkuð jafn en Tyrkirnir nýttu færin sín betur. Í dag var sagan önnur þar sem aðeins eitt lið var á vellinum í Tyrklandi.

Óskar Hrafn Þorvaldsson róteraði mikið í byrjunarliði Blika þar sem þeir eru að einbeita sér að titilbaráttunni í Bestu deildinni frekar en að reyna að snúa nokkuð ómögulegri stöðu við á gífurlega erfiðum útivelli.

Stefano Okaka, fyrrum landsliðsmaður Ítalíu, skoraði fyrsta mark Basaksehir í dag og bættu Ahmed Touba og Danijel Aleksic mörkum við eftir leikhlé.

Lokatölur urðu 3-0 fyrir Basaksehir sem vinnur samanlagt 6-1 eftir sigurinn í fyrri leiknum í Kópavogi.

Víkingur R. er þessa stundina að spila við Lech Poznan í Póllandi. Þeir eru þar tveimur mörkum undir og samanlögð staða í viðureigninni því 2-1 fyrir Lech Poznan.