Sporting vann langþráðan meistaratitil

Sporting frá Lissabon tryggði sér í gær portúgalska meistaratitilinn en nítján ár eru síðan liðið hampaði titlinum síðast.

Þrátt fyrir að hafa selt stjörnuleikmanninn Bruno Fernandes á síðasta tímabili hefur lið Sporting verið magnað á þessu tímabili.

Sporting er án ósigurs í þeim 32 umferðum sem eru búnar og á möguleika á því að verða fyrsta liðið í sögu portúgölsku deildarinnar til að fara í gegnum allar 34 umferðirnar án þess að tapa.

Porto og Benfica eru einu liðin sem hafa unnið portúgölsku deildina síðan Sporting vann síðast. Benfica er sigursælasta lið landsins með 37 titla, Porto er með 29 og Sporting 19.

Sporting innsiglaði titilinn í gær með 1-0 sigri á Boavista. Leikið var á tómum velli vegna Covid-19 en eftir sigurinn fóru leikmenn og fögnuðu fyrir utan leikvanginn með stuðningsmönnum.