Stig sem gæti reynst gulls ígildi - Markatalan okkur hliðholl í baráttunni

Stigið sem Ísland náði gegn Frakklandi í kvöld gæti þegar upp verður staðið reynst gulls ígildi í baráttunni við Úkraínu um annað sæti riðilsins. Ef Ísland og Úkraína verða jöfn að stigum mun markatalan ráða því hvort liðið verður ofar og þar er Ísland yfir sem stendur.

Tvær umferðir eru eftir af riðlinum og í lokaumferðinni leikur Úkraína heimaleik gegn Íslandi í Varsjá í Póllandi. Góðar líkur eru á að það verði úrslitaleikur um annað sætið.

Ef Ísland klárar útileikinn gegn Aserbaídsjan með sigri í næsta glugga, og Frakkar vinna Úkraínu á sama tíma, þá gera úrslitin í Laugardalnum í kvöld það að verkum að Íslandi mun nægja jafntefli gegn Úkraínu til að ná öðru sætinu. Annars hefði Ísland þurft sigur.