Erling Haaland virðist vera gjörsamlega óstöðvandi um þessar mundir og skoraði hann fyrsta mark leiksins í toppbaráttuslag Manchester City gegn Bournemouth í ensku úrvalsdeildinni í dag.

Haaland slapp í gegnum vörn Bournemouth sem var á miðlínunni og hljóp hraðar heldur en öll varnarlínan áður en hann skoraði framhjá Djordje Petrovic á milli stanganna.

Tyler Adams minnkaði muninn með fyrsta marktækifæri Bournemouth í leiknum en hann skoraði í kjölfar hornspyrnu. Gigi Donnarumma markvörður Man City misreiknaði sig í úthlaupinu og gaf þetta mark.

Mistök Ítalans komu þó ekki að sök því Haaland tók forystuna á nýjan leik fyrir heimamenn á 33. mínútu. Aftur brást rangstöðulína Bournemouth svo Haaland slapp einn í gegn og skoraði í autt markið eftir að hafa hlaupið framhjá Petrovic.

Man City var sterkara liðið í fyrri hálfleik og verðskuldaði forystuna en seinni hálfleikurinn var mun jafnari.

Bakvörðurinn sókndjarfi Nico O'Reilly skoraði næsta mark eftir einfalda sókn City á 60. mínútu og þar við sat, lokatölur 3-1.

Bæði lið fengu tækifæri til að bæta mörkum við leikinn en tókst ekki.

City er í öðru sæti deildarinnar eftir þennan sigur, með 19 stig eftir 10 umferðir. Sex stigum á eftir toppliði Arsenal.

Bournemouth er með 18 stig og deilir þriðja sætinu með Englandsmeisturum Liverpool.

Haaland er langmarkahæsti leikmaður úrvalsdeildartímabilsins til þessa með 13 mörk. Antoine Semenyo, leikmaður Bournemouth, er í öðru sæti með 6 mörk skoruð.