Newcastle getur ekki notað sumargluggann í að gjörbreyta öllum leikmannahóp sínum eins og önnur rík félög hafa gert í gegnum tíðina eins og Chelsea og Manchester City.
Þetta segir Eddie Howe, stjóri Newcastle, en enska félagið er með nýja eigendur frá Sádí Arabíu og byrjaði að styrkja sig í janúarglugganum sem hefur svo sannarlega skilað sér inni á vellinum.
Fjárlög UEFA koma þó í veg fyrir að Newcastle geti keypt frjálslega í sumar og þarf liðið að taka eitt skref í einu þegar kemur að því að bæta leikmannahópinn.
Howe er vel var við það en önnur félög sem hafa fengið inn moldríka eigendur í gegnum tíðina hafa ekki þurft að hugsa eins mikið um þessi lög.
Howe segir að það verði ekki eytt endalaust af peningum í leikmönnum í sumar og mun Newcastle fylgja öllum þeim reglum sem þarf að fylgja.
Liðið keypti til að mynda Bruno Guimaraes í janúarglugganum og hefur hann reynst liðinu frábær hingað til.
„Það er mikið til í þessu sem talað er um með fjárlög UEFA, við þurfum að fylgja ákveðnum reglum og getum ekki farið og eytt peningum eins og önnur félög hafa gert í gegnum tíðina og gjörbreytt hópnum í einum félagaskiptaglugga," sagði Howe.
„Því meiri pening sem þú eyðir í einum glugga þá hefur það áhrif á hversu mikið þú getur eytt í framhaldinu. Við þurfum að fylgja þessum reglum og það hefur áhrif á hvað við getum gert í sumar."
„Það þýðir þó ekki að við séum ekki með markmið. Við vitum það vel að við þurfum að breyta hópnum og bæta hann en að finna jafnvægið verður erfitt."
