Liverpool er á toppi ensku úrvalsdeildarinnar og mun vinna deildina, ef keppni verður haldið áfram á þessu tímabili. Deildin gæti mögulega verið spiluð eitthvað fram á sumar og ef það gerist þá gæti Liverpool unnið titilinn í búningum frá öðrum framleiðanda.

Liverpool hefur á tímabilinu, og síðustu tímabil, leikið í búningum frá New Balance en félagið mun skipta yfir í Nike frá og með 1. júní næstkomandi.

Fram kemur einnig í grein The Athletic að búið sé að loka æfingasvæði Liverpool í tvær vikur. Leikmenn æfa heima hjá sér og fá einstaklingsáætlun til að halda sér í góðu líkamlegu standi.

Liverpool á að mæta Manchester City þann 5. apríl, en ólíklegt þykir að sá leikur muni fara fram. Félög í ensku úrvalsdeildinni munu hittast á fimmtudag og ræða framhaldið.