Probierz: Höfum ekki sagt okkar síðasta

Pólverjar sýndu flotta spilamennsku gegn sterku liði Hollendinga og var staðan jöfn, 1-1, allt þar til á lokakaflanum þegar Wout Weghorst kom inn af bekknum og gerði sigurmarkið.

„Eftir leikinn sagði ég strákunum að við getum gengið stoltir af velli. Við erum á réttri braut. Við áttum að ná í stig hérna og getum sjálfum okkur um kennt, við vorum ekki nógu klókir á lokakaflanum. Frammistaðan var samt góð," sagði Probierz á fréttamannafundi eftir tapið, en Pólverjar eru einnig með Austurríki og Frakklandi í afar erfiðum riðli.

„Við munum ekki gefast upp, við höfum ekki sagt okkar síðasta á þessu móti. Við munum gera allt í okkar valdi til að sigra tvo síðustu leikina okkar. Við höfum mikla trú á hæfileikum okkar. Svo erum við að fá Robert Lewandowski og Pawel Dawidowicz aftur úr meiðslum, þeir geta tekið þátt í næsta leik.

„Við sýndum það í dag að við getum spilað góðan fótbolta. Við fengum mikið af færum og á öðrum degi hefðum við getað staðið uppi sem sigurvegarar."

Pólland mætir Austurríki á föstudaginn og spilar svo við ógnarsterkt lið Frakklands í lokaumferðinni.