Stelpurnar okkar þurfa sigur á morgun gegn Hollandi til að eiga möguleika á að komast upp úr riðli sínum á Evrópumótinu. Fótbolti.net ræddi við Sigurð Ragnar Eyjólfsson á hóteli landsliðsins í Växjö í hádeginu.
„Þetta er úrslitaleikur og ef við vinnum held ég að við förum pottþétt í 8-liða úrslit," sagði Sigurður Ragnar.
„Það er ótrúlega spennandi að fara í svona leik. Þetta er leikur sem alla dreymir um að spila í. Við erum að fara að mæta gríðarlega fljótu liði. Fremstu menn liðsins búa yfir miklum hraða. Við verðum að hafa góðar gætur á þeim."
„Þetta eru góðir einstaklingar sem eru að spila með toppliðum. Þetta er erfiður leikur en vonandi náum við að spila hann þannig að hann verði okkur í hag. Við teljum okkur eiga góða möguleika gegn þeim. Þetta er sterkt lið sem fór í undanúrslit á síðasta móti en er á svipuðum stað á heimslistanum."
Óvissa með miðjustöðurnar
Nokkuð er um meiðslavandræði í íslenska hópnum en liðið æfir í kvöld og þá kemur betur í ljós hverjar verða leikfærar. Siggi telur engar líkur á að Katrín Ómarsdóttir geti spilað og þá telur hann afar litlar líkur á að Guðný Björk Óðinsdóttir verði með.
„Það er mikið um meiðsli og slæmt að missa út þrjá miðjumenn í síðasta leik og Guðný Óðins meiddist á æfingu dagnn eftir. Það eru því fjórir tæpir miðjumenn fyrir leikinn og það er áhyggjuefni," sagði Sigurður Ragnar en viðtalið má sjá í heild í sjónvarpinu hér að ofan.
Athugasemdir
