Mbappe hefur tilkynnt stjórnendum franska félagsins að þetta verði hans síðasta tímabil í Frakklandi.

Hann hefur spilað fyrir PSG síðustu sjö ár og er nú klár í að halda á vit ævintýranna, en Real Madrid er líklegasti áfangastaður hans.

Það er langþráður draumur Mbappe að spila fyrir Real Madrid, en hann hélt mikið upp á Cristiano Ronaldo á yngri árum sínum. Mbappe hafnaði Real Madrid árið 2022 og valdi það að framlengja við PSG, en nú er hann klár í flutninga.

Liverpool, Arsenal og Manchester United hafa einnig verið nefnd til sögunnar, en Jürgen Klopp, stjóri Liverpool, segir að það yrði afar snúið fyrir félög að semja við leikmanninn.

„Ég hef enga hugmynd um það. Ég kem ekkert að því, en það myndi hins vegar koma mér verulega á óvart. Það væri afar snúið fyrir flest stórlið ef við tökum laun og undirskriftabónus inn í dæmið,“ sagði Klopp er hann var spurður út í orðróm um Mbappe.