„Deildin er að byrja í lok ágúst og við eigum líka leik á móti Bayern í Ofurbikarnum. Við erum að fara að æfa fyrir það," sagði Sveindís.

Sveindís á bara eitt ár eftir af samningi sínum við Wolfsburg og það hafa verið sögur þess efnis að önnur félög séu að reyna að fá hana. Orri Rafn Sigurðarson, fyrrum fréttamaður Fótbolta.net, sagði frá því fyrir um mánuði síðan að félög hefðu spurst fyrir um hana en Wolfsburg hefði neitað öllum fyrirspurnum í Sveindísi.

„Ég veit ekki neitt um það," sagði Sveindís og hló er hún var spurð út í áhugann á sér.

„Ég tek allavega þetta tímabil með Wolfsburg. Það er það eina sem ég veit núna. Ég er bara spennt fyrir því."