Jónas Grani var á vegum landsliðs Katar í gær.
Úr leiknum í gær.
Jónas Grani Garðarsson, fyrrum leikmaður FH, var mættur á vináttulandsleik Íslands og Katar í gær sem sjúkraþjálfari Katar.
Jónas Grani starfar í dag sem sjúkraþjálfari á bæklunar- og íþróttameiðslasjúkrahúsinu Aspetar í Doha í Katar. Margir þekktir íþróttamenn leita til Aspetar til að fá meðhöndlun.
„Það kemur þannig til að ég er að vinna fyrir Aspetar sem er innan Aspire-akademíunnar, sem er hluti af stórri sýn sem Katararnir eru með í tengslum við íþróttir og sérstaklega fótbolta og auðvitað HM 2022 (sem Katar heldur). Það vantaði sjúkraþjálfara og þá var leitað yfir til okkar. Ég tók þessa ferð," sagði Jónas Grani í viðtali við Fótbolta.net eftir leikinn.
„Ég fékk þessa ferð út af seinni andstæðingnum. Ég var talinn þola kuldann betur."
Jónas segir að lið Katar hafi spilað betur í gærkvöldi en oft áður. Verður Katar með frambærilegt landslið á HM 2022?
„Það er erfitt að ráða í það, ég þekki það ekki nógu vel. Þeir eru með fínt byrjunarlið en þeir eru með svipað vandamál og við. Það er fljótt að kvarnast úr gæðunum þegar þú þarft að leita út fyrir fyrstu 10, 12 14."
Jónas segir að það sé kannski aðeins of vel séð um leikmenn Katar.
„Það er mjög vel séð um þá, kannski alltof vel. Það ætti að láta þá hafa aðeins meira fyrir hlutunum, fótbolti er bara vinna. Það er stjanað við þessa stráka út og suður og kannski hefur það slæm áhrif," sagði Jónas.
Viðtalið er í heild sinni hér að ofan.
Athugasemdir
