Thelma Karen Pálmadóttir, leikmaður FH, hefur verið seld til sænska félagsins Hacken. Félagið greindi frá tíðindunum í morgunsárið.
Thelma er fædd árið 2008 og var kjörinn efnilegasti leikmaður Bestu-deildar kvenna á afstöðnu tímabili. Í kjölfar frábærs tímabils var hún kölluð upp í A-landsliðið og spilaði sinn fyrsta landsleik í síðasta mánuði.
"Það verður mikill söknuður af Thelmu Karen. Hún hefur núna síðastliðin þrjú tímabil tekið stór skref á hverju ári í rétta átt. Hún er ótrúlega hæfileikarík, eljusöm og tilbúin að leggja mikið á sig fyrir liðið. Núna á þessu tímabili sprakk hún út, varð betri með hverjum leik og var einn allra besti leikmaður deildarinnar.
Þetta er að okkar mati hárrétt skref fyrir hana að taka, að fara í besta lið Svíþjóðar. Þarna fær hún tækifæri til að þróa leik sinn enn frekar og spila á stærra sviði.
Við óskum Thelmu allt í haginn í Gautaborg, hlökkum til að fylgjast með hennar ferðalagi næstu árin og tökum síðan vel á móti henni þegar hún kemur heim eftir langan atvinnumannaferil,“ er haft eftir Davíð Þór Viðarssyni, yfirmanni fótboltamála hjá FH, í tilkynningu félagsins.
