Viktor Gyökeres skoraði eina mark leiksins úr vítaspyrnu í fyrri hálfleik en Arsenal var talsvert sterkara liðið á vellinum.

Lærlingar David Moyes í liði Everton vörðust mjög vel, þeir gáfu ekki mikið af færum á sér en þeir náðu heldur ekki að skapa mikið gegn sterkum andstæðingum.

Það næsta sem heimamenn komust því að skora mark var þegar þeir vildu nokkrum sinnum fá vítaspyrnu dæmda, en fengu ekki. Lokatölur urðu 0-1, sanngjarn sigur í nokkuð bragðdaufum leik.

Arsenal er með tveggja stiga forystu á toppi deildarinnar, með 39 stig eftir 17 umferðir. Everton er um miðja deild með 24 stig.

Á sama tíma skoraði Dominic Calvert-Lewin fyrstu tvö mörk leiksins er Leeds United lagði Crystal Palace nokkuð þægilega að velli.

Leeds var mikið betra liðið í fyrri hálfleik og skoraði Calvert-Lewin tvennu og komu bæði mörkin eftir löng innköst. Calvert-Lewin var vel vakandi og fljótur að bregðast við í bæði skiptin eftir að liðsfélagar hans unnu fyrsta boltann.

Leeds var áfram sterkari aðilinn í síðari hálfleik og setti Ethan Ampadu þriðja markið eftir atgang í kjölfar hornspyrnu. Palace átti í miklum erfiðleikum með að skapa sér færi en tókst að minnka muninn með marki úr vítaspyrnu. Það mark kom í uppbótartíma og héldu lærisveinar Oliver Glasner áfram að reyna að minnka muninn, en tókst ekki. Þess í stað skoraði Anton Stach fjórða mark Leeds á elleftu mínútu uppbótartímans með laglegri aukaspyrnu.

Leeds fer upp í 19 stig með sigrinum á meðan Crystal Palace er með 26 stig. Sigur hjá Palace í kvöld hefði fleytt liðinu uppfyrir Englandsmeistara Liverpool á markatölu og upp í fimmta sæti.

Everton 0 - 1 Arsenal
0-1 Viktor Gyokeres ('27 , víti)

Leeds 4 - 1 Crystal Palace
1-0 Dominic Calvert-Lewin ('38 )
2-0 Dominic Calvert-Lewin ('45+4 )
3-0 Ethan Ampadu ('60 )
3-1 Justin Devenny ('92 , víti)
4-1 Anton Stach ('101)