Raphael Honigstein, einn virtasti fjölmiðlamaður Þjóðverja, telur að þýska landsliðið þurfi á breytingum að halda fyrir Evrópumótið næsta sumar.
Joachim Löw hefur stýrt Þýskalandi í 14 ár. Hann gerði liðið að heimsmeisturum 2014 en eftir það hefur árangurinn ekki verið góður. Liðið féll úr leik í riðlakeppninni á HM 2018.
Þýskaland tapaði 6-0 fyrir Spánverjum í Þjóðadeildinni á dögunum og Honigstein vill meina að það sé kominn tími á að Löw taki sér annað fyrir hendur.
„Áhuginn, sérstaklega á meðal yngri leikmanna, hefur verið lítill í Þjóðadeildinni. Löw nýtur ekki sömu tengsla og hann gerði með Schweinsteiger kynslóðinni, og það er ólíklegt að það breytist. Leikmennirnir myndu samt fylgja honum ef þeir trúðu á stefnu hans, en það er augljóst að þeir gera það ekki," skrifar Honigstein fyrir The Athletic.
Hann hljómar ekki mjög bjartsýnn fyrir EM þar sem Þýskaland er í riðli með Frakklandi, Ungverjalandi og Portúgal.
Honingstein telur að það sé fáanlegur mjög öflugur einstaklingur til að taka við Löw. Sá einstkalingur: Ralf Rangnick, sem er 62 ára gamall og hefur stýrt félögum á borð við Stuttgart, Schalke og Hoffenheim á ferlinum. Hann var síðast yfirmaður íþróttamála hjá Red Bull.
„Sérstaklega myndi sérþekking hans á þróun fótboltamanna hjálpa knattspyrnusambandinu sem ætlar sér í aðra byltingu á unglingastarfinu. Í júní 2021 verður Rangnick væntanlega kominn í annað starf nema þýska knattspyrnusambandið heyri í honum núna," skrifar Honigstein.
„Það eru hins vegar frekar líkur á því að þeir haldi áfram í því sama, í von um að liðið leiðrétti sig þegar það hittist aftur í mars. Það lofar ekki góðu."
Athugasemdir