Leicester vann einfaldan sigur á West Brom í eina leik kvöldsins í ensku úrvalsdeildinni.

Refirnir stjórnuðu ferðinni frá A til Ö og gengu frá leiknum áður en flautað var til hálfleiks.

Jamie Vardy skoraði fyrsta markið á 23. mínútu. Youri Tielemans átti frábæra sendingu á Timothy Castagne; bakvörðurinn sendi boltann á Vardy sem kláraði vel.

Þremur mínútum síðar skoraði Jonny Evans, fyrrum leikmaður West Brom, eftir hornspyrnu Tielemans. Kelechi Iheanacho, sem hefur verið sjóðandi heitur undanfarnar vikur, gerði svo þriðja markið á 36. mínútu eftir undirbúning Vardy.

„Þegar þeir eru á deginum sínum þá er Leicester líklega uppáhalds liðið mitt til að horfa á í ensku úrvalsdeildinni. Þeir eru ekki að halda boltanum bara af því bara, en þeir eru ekki of beinskeyttir heldur. Þetta er hratt og fínt," skrifaði Tom Rostance í beinni textalýsingu BBC.

Það voru engin mörk skoruð í seinni hálfleiknum en heilt yfir frábær frammistaða hjá Leicester sem er í þriðja sæti með 59 stig. West Brom er níu stigum frá öruggu sæti þegar liðið á sex leiki eftir. Þetta verður erfitt verkefni fyrir þá og útlit fyrir að Sam Allardyce, stjóri West Brom, sé að fara að falla úr ensku úrvalsdeildinni í fyrsta sinn á sínum stjóraferli.