Pólski dómarinn Szymon Marciniak sem dæmdi úrslitaleik HM í Katar með glæsibrag hefur verið valinn til að dæma úrslitaleik Meistaradeildar Evrópu þetta árið, leik Manchester City og Inter sem fram fer í Istanbúl 10. júní.

Marciniak hefur aldrei áður dæmt úrslitaleik í Evrópukeppni. Hann er 42 ára gamall og hefur verið að dæma í rúmlega 20 ár. Hann varð FIFA dómari fyrir tólf árum síðan.

Marciniak hefur dæmt eftirminnilega leiki hjá Íslandi í gegnum tíðina. Hann dæmdi sigur okkar gegn Austurríki á EM 2016, sigur okkar liðs gegn Tyrklandi í undankeppninni fyrir HM í Rússlandi og svo jafnteflið gegn Argentínu á lokamótinu sjálfu.