Verið erfiður dagur fyrir Max Allegri og félaga

Mynd: EPA

Chiesa skoraði

Mynd: Getty Images

Það gengur ekkert upp hjá Juventus þessa dagana en liðið féll úr leik í Evrópudeildinni í vikunni eftir tap gegn Sevilla.

Í kvöld kom svo í ljós að 10 stig voru dregin af liðinu eftir að áfrýjun þeirra fyrr á þessu tímabili var snúið við. Liðið missti 15 stig fyrr á tímabilinu en fékk þau til baka en niðurstaðan er nú að 10 stig hafa verið dregin af þeim.

Það þýðir að liðið er í 7. sæti og fimm stigum frá Meistaradeildarsæti þegar tvær umferðir eru eftir.

Liðið mætti Empoli í deildinni í kvöld og byrjaði betur þar sem Federico Gatti kom boltanum í netið eftir skalla frá Arkadeuz Milik sem hafnaði í slánni. Dómari leiksins dæmdi hins vegar brot og markið ógilt.

Empoli komst yfir með marki úr vítaspyrnu á 18. mínútu og staðan var orðin 2-0 þremur mínútum síðar.

Empoli gerði út um leikinn strax í upphafi síðari hálfleik þegar þriðja markið kom. Federico Chiesa klóraði í bakkann en Empoli skoraði síðasta markið í uppbótartíma.

Juventus er fimm stigum á eftir AC Milan sem situr í fjórða sæti en liðin mætast í næst síðustu umferð. Juventus endar tímabilið gegn Udinese sem siglir lygnan sjó.