Fótboltakeppnin á Ólympíuleikunum fer af stað á miðvikudaginn og verður spilað í sjö borgum í Frakklandi. Úrslitaleikirnir í karla- og kvennaflokki verða spilaðir á Prinsavöllum í París. BBC skoðaði stærstu nöfnin í fótboltanum á Ólympíuleikunum.
Julian Alvarez (Argentína) - Nýkominn frá Bandaríkjunum þar sem Argentínumenn unnu Copa America. Alvarez er 24 ára sóknarleikmaður sem skoraði ellefu mörk fyrir Manchester City á síðasta tímabili. Argentínumenn eru sigurstranglegastir á Ólympíuleikunum.
Marta (Brasilía) - Marta er lifandi goðsögn í kvennaboltanum. Hún er 38 ára og hyggst leggja landsliðsskóna á hilluna eftir leikana. Hún hefur tvisvar fengið silfur á Ólympíuleikunum en nú ætlar hún að kveðja með gulli.
Achraf Hakimi (Marokkó) - Þessi 25 ára leikmaður missir af undirbúningstímabili Paris St-Germain þar sem hann verður á Ólympíuleikunum.
Wendie Renard (Frakkland) - Þessi 34 ára varnarmaður tekur þátt í sínum þriðju Ólympíuleikum. Hefur leikið 160 landsleiki fyrir Frakkland en hefur aldrei unnið stóran titil með þjóð sinni.
Fermín López (Spánn) - Var í hópnum hjá Spáni sem vann EM. Kom aðeins við sögu í einum leik í Þýskalandi en vonast til að skrifa söguna og verða sá fyrsti til að vinna EM og Ólympíugull sama sumarið. López skoraði ellefu mörk fyrir Barcelona á síðasta tímabili.
Barbra Banda (Sambía) - Varð næstdýrust í sögunni þegar hún fór til Orlando Pride frá Kína í mars. Þessi 24 ára leikmaður skoraði 11 mörk í 11 fyrstu leikjum sínum í Bandaríkjunum. Markadrottning.
