Þeir eru ekki með stjóra, níu leikmenn sem eru samningslausir í sumar og félagið skuldar 65 milljóna punda lán sem eigendur félagsins tóku. Fallhlífargreiðslurnar munu hjálpa Burnley eitthvað en félagið hefur reitt sig á sjónvarpspeninga úrvalsdeildarinnar og er ekki sjálfbært án þeirra.

Meðal þeirra sem eru að renna út á samningi er varnarmaðurinn James Tarkowski sem er á förum og fyrirliðinn Ben Mee sem hefur verið hjá félaginu í áratug.

Ekki er talið að Burnley eigi möguleika á því að fá inn alvöru upphæðir fyrir leikmenn, markvörðurinn Nick Pope er dýrasta söluvaran. Félagið er án stjóra og því erfitt að plana framtíðina. Ólíklegt er talið að Mike Jackson bráðabirgðastjóri verði ráðinn til frambúðar

Það er gríðarlegt óvissuástand hjá Burnley og ljóst að forráðamenn félagsins þurfa að halda vel á spilunum og taka réttar ákvarðanir í sumar.