Endurkoma Parma í A-deildina fer vel af stað. Liðið gerði 1-1 jafntefli við Fiorentina í fyrstu umferðinni og náði þá í fyrsta sigurinn á heimavelli sínum í dag.

Rúmenski leikmaðurinn Dennis Man kom Parma yfir á 2. mínútu með skoti af stutt færi eftir sendingu frá vinstri. Hann gat tvöfaldað forystuna undir lok fyrri hálfleiks er hann slapp einn í gegn, en brást bogalistin. Boltinn datt síðan fyrir samlanda hans, Valentin Mihaila, sem var einn gegn opnu marki en tókst ekki að skora.

Milan náði að sækja meira á Parma í byrjun síðari. Tijjani Reijnders átti þrumuskot í slá áður en jöfnunarmarkið kom. Rafael Leao fékk boltann í teignum áður en hann lagði boltann út á Christian Pulisic sem skoraði.

Þrettán mínútum fyrir leikslok kom sigurmarkið og voru það nýju mennirnir sem bjuggu það til. Pontus Almqvist fékk boltann úti vinstra megin, kom með laglega sendingu fyrir markið og á Matteo Cancellieri sem átti ekki í vandræðum með að skila boltanum í netið.

Frábær sigur hjá Parma sem er með fjögur stig úr tveimur leikjum en Milan aðeins með eitt stig.

Ítalíumeistarar Inter unnu 2-0 sigur á Lecce. Matteo Darmian skoraði á fimmtu mínútu áður en Hakan Calhanaoglu bætti við öðru marki úr vítaspyrnu á 69. mínútu. Fyrsti sigur Inter á tímabilinu en Lecce án stiga.

Þórir Jóhann Helgason sat allan tímann á varamannabekk Lecce.

Tíu leikmenn Udinese unnu þá 2-1 sigur á Lazio á meðan Genoa lagði Monza að velli, 1-0.

Úrslit og markaskorarar:

Inter 2 - 0 Lecce
1-0 Matteo Darmian ('5 )
2-0 Hakan Calhanoglu ('69 , víti)

Monza 0 - 1 Genoa
0-1 Andrea Pinamonti ('45 )

Parma 2 - 1 Milan
1-0 Dennis Man ('2 )
1-1 Christian Pulisic ('66 )
2-1 Matteo Cancellieri ('77 )

Udinese 2 - 1 Lazio
1-0 Lorenzo Lucca ('5 )
2-0 Florian Thauvin ('49 )
2-1 Gustav Isaksen ('90 )
Rautt spjald: Hassane Kamara, Udinese ('68)