Bayern tók á móti Schalke í lokaleik dagsins í þýsku Bundesliga. Robert Lewandowski skoraði fyrsta markið á 6. mínútu þegar hann fékk boltann frá Ivan Perisic í teignum. Markvörður Schalke hélt ekki fyrirgjöf frá hægri og boltinn fór á Perisic sem kom honum á Lewandowski sem hamraði boltann í netið.

Thomas Muller kom Bayern í 2-0 í uppbótartíma fyrri hálfleiks þegar hann kom boltanum í netið af stuttu færi eftir skallasendingu Leon Goretzka. Goretzka skoraði sjálfur þriðja markið þegar hann fylgdi á eftir eigin skalla og klippti boltann afar smekklega í netið.

Thiago Alcantara skoraði 4. markið á 58. mínútu eftir góðan undirbúning Lewandowski. Fimmta markið kom svo á 89. mínútu. Spurning er hvort markið verði skráð á Serge Gnabry eða markvörð Schalke, Markus Schubert. Boltinn fór af Schubert í netið eftir skot Gnabry af vinstri kantinum.

5-0 sigur Bayern staðreynd og liðið er einungis stigi á eftir toppliði Leipzig eftir leiki dagsins.