Franska félagið Strasbourg hefur spurst fyrir um að fá portúgalska sóknartengiliðinn Fábio Carvalho á láni frá Brentford, en enska félagið hefur engan áhuga á að lána hann út í janúar.
Carvalho er 22 ára gamall og hefur komið við sögu í 21 leik á tímabilinu í öllum keppnum og komið að fimm mörkum.
Thomas Frank þjálfari Brentford ætlar að nota Carvalho á seinni hluta tímabils og hefur félagið engan áhuga á að senda leikmanninn út á lánssamningi.
Liam Rosenior, þjálfari Strasbourg, hefur miklar mætur á Carvalho eftir að hafa þjálfað hann þegar hann var á láni hjá Hull City í fyrra.
Strasbourg er í eigu sömu aðila og eiga Chelsea og gæti enska stórveldið sýnt Carvalho áhuga næsta sumar.
Athugasemdir
