Chrysty Pym er að upplifa blendnar tilfinningar
Chrysty Pym, markvörður Grimsby Town, er að upplifa blendnar tilfinningar eftir að hafa unnið Manchester United í 2. umferð deildabikarsins í kvöld.
Pym var frábær í leiknum og varði nokkur góð skot, en gat lítið gert í þessum tveimur mörkum sem Grimsby fékk á sig undir lok leiksins.
Í vítakeppninni varði hann frá Cunha en tókst ekki að verja víti í bráðabananum. Bryan Mbeumo skaut boltanum í þverslá og var það nóg fyrir Grimsby til að komast áfram.
Eftir leikinn var Pym að upplifa furðulegar tilfinningar, en hann er mikill United-maður.
„Ég er stuðningsmaður Manchester United þannig ég er hálfreiður, en kvöld eins og þessi eru samt ástæðan fyrir því að maður spilar fótbolta. Þetta var fallegt en ég hefði átt að gera aðeins betur í vítakeppninni. Við fórum yfir þær með þjálfaranum, en þeir voru alltaf að breyta um stað. Ég var svolítið brjálaður yfir því,“ sagði Pym eftir leikinn.
Athugasemdir
