Ítalski þjálfarinn Gennaro Ivan Gattuso hefur samþykkt að taka við franska liðinu Marseille en þetta segir ítalski íþróttafréttamaðurinn Fabrizio Romano.
Marcelino tók við Marseille í júní en sagði starfi sínu lausu á dögunum og bar fyrir sig persónulegar ástæður.
Stuðningsmenn Marseille hótuðu og móðguðu Marcelino sem var ástæðan fyrir brotthvarfinu.
Fabrizio Romano greindi frá því í gær að Gattuso væri nú búinn að samþykkja að taka við keflinu, en stuðningsmenn Marseille hugsa sig eflaust tvisvar um áður en þeir vaða í hann.
Gattuso var síðast þjálfari Valencia á Spáni, en hætti með liðið í janúar. Hann þjálfaði áður Milan, Napoli, Fiorentina, OFI Crete, Sion, Palermo og Pisa.
Hann mun fljúga til Marseille á næsta sólarhringnum til að ganga frá samningum áður en hann verður kynntur.
Athugasemdir
