Jóhannes Karl Guðjónsson þjálfari HK.
„Það eru ágætis punktar í þessum leik, en við fengum þrjú mörk í andlitið á alltof stuttum kafla í fyrri hálfleik. Það skilaði þeim þessum sigri í dag," sagði Jóhannes Karl Guðjónsson þjálfari HK eftir 0-3 tap heima gegn Fylki í Inkasso deildinni í dag.
Lestu um leikinn: HK 0 - 3 Fylkir
Fylkir skoraði öll mörkin á 13 mínútna kafla í lok fyrri hálfleiksins og gerði í raun út um leikinn með því.
„Ég var ánægður með seinni hálfleikinn hjá okkur. Við ákváðum að fara grjótharðir inn í hann, ætluðum að gefa ekki færi á okkur og hefðum alveg getað náð einu eða tveimur mörkum ef þetta hefði dottið aðeins með okkur. Við komumst í fína stöðu. Ég er drullu svekktur en við enduðum þetta samt sem áður með ágætan seinni hálfleik."
Jóhannes Karl skammaðist í Elíasi Inga Árnasyni dómara í hálfleik en aðspurður út í það atvik minntist hann á tæklingu Ásgeirs Eyþórssonar á Ingimar Elí Hlynsson í miðjuboganum á 42. mínútu en upp úr henni skoraði Fylkir annað markið sitt.
„Maður er alltaf eitthvað ósáttur við dómarann og það er ekki alltaf sanngjarnt af manni. Maður æsist upp öðru hvoru en mér fannst vera tveggja fóta tækling hjá Ásgeiri Eyþórssyni. Hann hendir sér í tveggja fóta tæklingu inni á miðjunni og eftir mínum skilningi er bannað að tækla þannig. Ég var ósáttur við það því mér fannst þetta tveggja fóta tækling sem er ekki lögleg."
Nánar er rætt við Jóhannes Karl í sjónvarpinu hér að ofan.
Athugasemdir
