England: Úlfarnir of góðir fyrir Arsenal

Arsenal tók á móti Wolves í síðasta leik dagsins í ensku úrvalsdeildinni. Viðureignin fór hægt af stað þar sem stöðva þurfti leikinn snemma eftir að Raul Jimenez og David Luiz skullu saman í skallaeinvígi. Jimenez var fluttur á sjúkrahús á meðan Luiz var skipt út hálfleik.

Úlfarnir voru mun betri í fyrri hálfleik og tóku forystuna á 27. mínútu þegar Pedro Neto fylgdi skalla Leander Dendoncker eftir með marki.

Brasilíski miðvörðurinn Gabriel Magalhaes jafnaði skömmu síðar, með skalla eftir hornspyrnu, en Daniel Podence gerði mjög vel að koma Úlfunum yfir á nýjan leik.

Úlfarnir verðskulduðu forystuna í leikhlé og reyndu heimamenn í Arsenal að sækja jöfnunarmark í síðari hálfleik.

Þær tilraunir báru ekki mikinn árangur þar sem ekki ein marktilraun liðsins hæfði rammann. Niðurstaðan sanngjarn sigur Wolves sem er í sjötta sæti með 17 stig eftir 10 umferðir. Arsenal er í neðri hluta deildarinnar með 13 stig.