Leiknum lauk með 3-1 sigri Liverpool en þegar Trent Alexander Arnold kom liðinu yfir í fyrri hálfleik kveiktu stuðningsmenn Liverpool á blysum og köstuðu þeim inná völlinn.
Það gerðist aftur þegar Salah kom liðinu aftur yfir með marki úr vítaspyrnu.
Enska knattspynusambandið rannsakar málið en sambandið ætlar að taka harðar á óprúttnum stuðningsmönnum á þessari leiktíð eftir að alltof mörg atvik komu upp á síðustu leiktíð þar sem áhorfendur ruddust inná völlinn.
„Við vitum af þessum atvikum á leiknum um Samfélagsskjöldinn þar sem blys og ryksprengjur voru notaðar. Notkun á blysum er hættuleg, bönnuð og gæti haft hræðilegar afleiðingar í för með sér á fótboltavelli," segir í yfirlýsingu frá knattspyrnusambandinu.
Harvey Elliott leikmaður Liverpool var áminntur eftir að hafa borið blys eftir sigur Liverpool í Deildabikarnum á síðustu leiktíð. Þá var Richarlison þáverandi leikmaður Everton dæmdur í eins leiks bann á síðustu leiktíð fyrir að kasta blysi af vellinum.
