Erlingur segist eiga markið - Tók þjálfarasvarið

„Við byrjuðum mjög vel, pressuðum þá strax, skoruðum þessi þrjú mörk og eftir það vorum við bara að halda þetta út," sagði Erlingur sem hafði ekki séð fyrir sér að vera 3-0 yfir eftir 20 mínútna leik á Kópavogsvelli.

Erlingur skoraði klárlega þriðja mark Víkings í leiknum en einhver vafi var hvort að fyrsta markið hefði verið sjálfsmark. Erlingur segist líka eiga það mark.

„Það er mitt mark, ég er með tvö." Fer höndin á þér í boltann í fyrsta markinu? „Nei, bara mjöðmin á mér eða eitthvað... ég veit það ekki, verð að fá sjá þetta aftur." Sem er svar sem þjálfarar vinna mikið með. Markið má sjá hér neðst í fréttinni.

Breiðablik er efst í deildinni. Voru Víkingar með sigrinum í kvöld, þrátt fyrir að um bikarleik væri að ræða, að senda ákveðin skilaboð fyrir endasprettinn í deildinni?

„Já. Vonandi fara þeir að tapa einhverjum stigum þar."

Víkingur er á leið í þriðja bikarúrslitaleikinn í röð. Hvað er með þetta Víkingslið og bikarinn?

„Ég veit ekki hvað það er, mér finnst bara gaman að spila stóra leiki og okkur hefur gengið vel í þeim hingað til. Vonandi heldur það áfram," sagði Erlingur.

Viðtalið í heild sinni má sjá í spilaranum að ofan.

Víkingur R. er komin yfir eftir að boltinn fer af leikmanni Breiðabliks - mark komið á fimmtu mínútu leiksins pic.twitter.com/Ls5WNEgY0A

— RÚV Íþróttir (@ruvithrottir) August 31, 2022