Ítalía: Bologna hafði betur í fimm marka veislu

Andri Fannar Baldursson sat allan tímann á bekknum er Bologna náði í sinn annan sigur á deildartímabilinu.

Bologna fékk Cagliari í heimsókn og lék á alls oddi eftir að hafa lent undir snemma leiks. Hinn eftirsótti Joao Pedro kom Cagliari yfir en heimamenn í Bologna tóku öll völd á vellinum og voru óheppnir að jafna ekki fyrr en undir lok hálfleiksins. Musa Barrow gerði þá frábært mark eftir sendingu frá Roberto Soriano.

Giovanni Simeone kom Cagliari yfir á nýjan leik í upphafi síðari hálfleik en Bologna hélt áfram að ráða ferðinni og var Soriano ekki lengi að jafna.

Fjórum mínútum eftir jöfnunarmarkið skoraði Barrow aftur og staðan orðin 3-2 fyrir heimamenn.

Bologna var áfram betri aðilinn og tókst gestunum frá Cagliari ekki að jafna. Lokatölur 3-2 og Bologna er komið í sex stig eftir sex umferðir, en liðið hefur verið ansi óheppið með úrslit á upphafi tímabils. Cagliari er með sjö stig.

Markatölur liðanna vekja athygli eftir aðeins sex umferðir. Það hafa verið skoruð 27 mörk í leikjum Cagliari og 23 í leikjum Bologna. Það eru rúmlega fjögur mörk á leik.