,,Það er alltaf leiðinlegt að tapa, við þurftum ekkert að gefa þeim þessi mörk og áttum að geta haldið þetta út eins og við höfum verið að gera í síðustu leikjum. Það vantaði eitthvað hjá okkur í dag," sagði Kristján Hauksson fyrirliði Fram eftir 2-1 tap gegn Leikni í Lengjubikarnum í kvöld.
,,Leiknismenn voru mjög sprækir og við vissum það svosem alveg. Þeir voru búnir að vinna Vestmannaeyinga og það var ekkert vanmat í gangi. En fyrst þeir unnu þá spiluðu þeir betur en við."
Jón Guðni Fjóluson meiddist með Fram fyrir nokkrum vikum og var ekki með í kvöld. En er vitað hversu lengi hann verðu frá?
,,Nei, hann er að jafna sig, það verður kannski vika eða tvær vikur, ég veit það ekki. Hann verður allavega klár fyrir mót."
Fram hafði unnið tvo leiki í Lengjubikarnum fyrir leikinn gegn Leikni í kvöld. Kristján er ánægður með liðið.
,,Við erum í fínu formi, ég er nokkuð ánægður með liðið. Við höfum verið að spila ágætlega þó við höfum ekki spilað sérstaklega vel í kvöld. Það er ágætis gangur í þessu," sagði Kristján en Fram liðið æfir utandyra allajafna.
,,Já, við erum ekki í neinni höll, það er fínt að venjast veðráttunni úti. Það getur allt gerst í sumar. Við erum með góðan aðstoðarþjálfara sem var búinn að skafa hluta af vellinum og reddaði okkur svo við gátum alveg æft. Það hefur engin áhrif á okkur."
