Grétar Rafn Steinsson, hægri bakvörður Bolton, er spenntur fyrir undanúrslitaleiknum gegn Stoke í enska bikarnum á sunnudag. Liðin munu mætast á Wembley klukkan 15:00 og Grétar er bjartsýnn fyrir leikinn.
,,Það verður gaman að mæta Stoke. Þeir eru með hrikalega sterkt lið og það er erfitt við þá að eiga, sérstaklega í föstum leikatriðum,” sagði Grétar við Fótbolta.net.
,,Þeir eru líka með mjög góða leikmenn inn á milli. Þeir hafa breyst svolítið síðan að þeir komu upp og eru með flinkari leikmenn. Þeir geta mixað þessu svolítið með því að spila fótbolta og líka beitt þessum löngu innköstum, hornspyrum og aukaspyrnum inn í boxið.”
,,Við erum líka með fínt lið og þetta verður skemmtileg viðureign. Liðið sem fer í úrslitin á það svo sannarlega skilið.”
Manchester United og Manchester City mætast í hinum undanúrslitaleiknum á morgun en úrslitaleikurinn sjálfur fer fram á Wembley 14. maí.
,,Ég held að bæði við og Stoke teljum okkur eiga ágætis möguleika í þessum leik og þetta verður hörkubardagi jafnt eins og hjá hinum liðunum. Úrslitaleikurinn ætti að verða sérstaklega skemmtilegur.”
Hér að ofan má sjá viðtalið í heild sinni.
