Ásmundur Arnarsson þjálfari Fjölnis var svekktur með að hafa ekki fengið meira úr leik sinna manna gegn BÍ/Bolungarvík í kvöld, en honum lauk með 1-1 jafntefli. Hann var samt sem ánægður með að hafa náð að jafna metin í uppbótartíma.
„Það má segja að tilfinningarnar séu blendnar. Annars vegar er ég ósáttur við að fá ekki meira úr leiknum, ég vil meina að við höfum stjórnað leiknum að mestum hluta til, boltinn gekk á milli manna og það sem við lögðum upp með var að ganga þokkalega vel upp. Hins vegar er ég kannski ánægður með það að ná jöfnunarmarki hérna í lokin,“ sagði Ásmundur við Fótbolta.net eftir leikinn.
Eins og áður kom fram jöfnuðu Fjölnismenn metin í blálokin en þar var á ferð Marínó Þór Jakobsson með frábæru skoti. Ásmundur viðurkennir að það hafi verið jálvætt en vildi fá meira fyrir sinn snúð.
„Það er jákvætt en maður er ósáttur við bara eitt stig, en spilamennska strákanna var góð heilt yfir og ég var ánægður með þá. Þeir skora auðvitað gott mark og reyndar held ég að bæði lið séu ósátt með að fá bara eitt stig út úr þessu, það eru færi á báða bóga. Þannig að hugsanlega er niðurstaðan sanngjörn,“ sagði Ásmundur.
Vafasamt atvik átti sér stað í stöðunni 1-0 fyrir BÍ/Bolungarvík, en þá átti Kristinn Freyr Sigurðsson skot í slána og boltinn virtist fara yfir marklínuna. Ekkert mark var þó dæmt og var Ásmundur ósáttur með það.
„Ég vil meina að við höfum skorað löglegt mark þegar Kiddi á skot í slána og að mínu mati inn fyrir línuna, en maður fær ekki allt í þessu. Línuvörðurinn sagðist bara ekki hafa séð þetta, en ég held að hann hafi klárlega verið inni og þeir sem voru þarna í línu voru sammála því,“ sagði Ásmundur við Fótbolta.net.
Viðtalið má sjá í heild sinni hér að ofan.
