Bjarni Jóhannsson þjálfari Stjörnunnar var hæstánægður með 5-1 sigur sinna manna gegn Þórsurum þar sem þeir voru manni færri allan seinni hálfleikinn en skoruðu samt þrjú mörk.
„Þetta var flottur sigur og þrátt fyrir að við verðum fyrir ákveðnum áföllum í leiknum tökum við þetta alveg af gríðarlegum krafti og kláruðum þennan leik mjög vel,“ sagði Bjarni við Fótbolta.net.
„Við breyttum aðeins áherslunum í seinni hálfleik og leyfðum þeim að koma aðeins við boltann og gáfum ákveðin svæði eftir. Við fengum nánast engin færi á okkur nema kannski eina hættulega fyrirgjöf.“
Bjarni var ekki sáttur með rauða spjaldið sem Baldvin Sturluson fékk og það skiljanlega.
„Þetta var mjög grimm ákvörðun, mér fannst brotið á mínum manni og svo var einhver smá hefnifílingur í Baldvin, en mér fannst þetta frekar grimmt.“
Jesper Jensen fór sárþjáður af velli í seinni hálfleik vegna meiðsla og leit þetta ansi illa út. Ljóst er að það yrði mikið áfall fyrir Stjörnuna að missa þennan frábæra Dana.
„Þetta er eitthvað í hnénu á honum, það kemur í ljós tveggja daga. Að sjálfsögðu yrði áfall að missa hann til lengri tíma, hann er búinn að vera einn af betri leikmönnum hérna í mótinu hjá okkur.“
Viðtalið við Bjarna má sjá í heild sinni hér að ofan.
