Heimir Þorsteinsson.
„Þetta var verulega sárt," sagði Heimir Þorsteinsson, þjálfari Fjarðabyggðar, eftir 3-2 tap fyrir Aftureldingu í kvöld. Eftir að hafa verið 2-0 yfir fékk Fjarðabyggð á sig sigurmark í uppbótartíma.
„Við áttum að komast í 3-0 strax eftir að við skoruðum annað markið. Þetta var alveg hrikalega blóðugt maður."
Heimir var allt annað en sáttur við aukaspyrnudóm aðstoðardómarans Hallgríms Viðars Arnarssonar sem flaggaði aukaspyrnuna í uppbótartíma sem Afturelding skoraði upp úr.
„Ég er mjög ósáttur við hann því menn geta ekki fengið aukaspyrnu ef það er engin snerting. Það var engin snerting. Aðstoðardómarinn var beint ofan í þessu," sagði Heimir sem vildi ekki kenna dómurunum um tapið
„Ég hefði getað lamið þennan aðstoðardómara... en ég geri ekki svoleiðis, ég er góður strákur."
Viðtalið við Heimi má sjá í heild sinni í sjónvarpinu hér að ofan en þar talar hann meðal annars um botnbaráttuna framundan og þann liðsstyrk sem Fjarðabyggð ætlar að ná sér í í félagaskiptaglugganum sem opnar í næstu viku.
